Kapin P1 milyon nga kantidad sa alahas gikawat

CEBU, Philippines - Mokabat kapin usa ka milyon ka pesos nga alahas ang nasakiyo sa usa ka kawatan gikan sa panimalay sa usa ka 70- anyos nga balikbayan niadtong Miyerkules sa buntag diha sa Felicitas Village sa barangay Looc sa dakbayan sa Mandaue .

Igo na lang sa pagdangop sa kapolisan ang biktimang si Gertrudes Uy kuyog sa iyang anak human sila madiskubrehing gilungkab ang ilang apartment ug gisakiyo niini ang mga alahas samtang siya ug iyang anak ang nanglakaw niadtong tungora.

Nasayran na lamang ang nahisgutang insidente human ang katabang niini nga usa ka “stay-out” ang natingala nga sa iyang pagsugod na unta og trabaho niadtong higayona nga wala na ma –lock ang pultahan sa apartment. Sa iyang pagsud nakay-ag na ang mga butang sa sulod hinungdan nga dali niyang gitawgan ang iyang mga amo. Ang gikawat mao ang gold rope necklace nga adunay pares nga bracelet nga nagkantidad og $1,000, laing usa ka gold  flowerets onyx  nga dunay diyamante ug aduna say pares nga bracelet nga nagkantidad gihapon og $1,200, duha ka mga bracelets nga nagkantidad og $900,duha ka gold nga relo nga nagkantidad og $1,500, solitaire nga singsing $1,950, singsing nga rhinestone $150, college gold ring P2,000, letter /G ring P2,000,laing duha ka solitaire nga singsing $1,400, 20 ka mga silver coins nga collectors item nga nagkantidad og $3,000, usa ka dako nga silver coin nga nagkantidad og $1,500, diamond earrings nga $1500, sunflower earring nga $900 ug gold choker necklace nga nagkantidad og $1300.

Ang kapolisan sa Opao Police Station  padayon pa sa ilang imbestigasyon sa maong kaso. (/EIM) (BANAT NEWS)