Mipatay sa anak ug milubong niini gikasohan na
CEBU, Philippines - Gipasakaan na og kaso kagahapong adlawa ang 29 anyos nga dalagang pina-angkan nga giingong miunay og patay ug milubong sa iyang anak nga babaye diha sa ilang tugkaran pipila ka oras human niya kini gipakatawo niadtong nakalabay’ng Biyernes diha sa barangay Balud ug Panadtaran lungsod sa San Fernando.
Matud ni PO1 Mary Jean Estrera sa Womens Desk sa San Fernando Police Station dihang nahinabi sa Banat News kasong Infanticide ang ilang gipasaka batok kang Jackielyn Soronio, 29.
Ang kapolisan adunay testigo nga 14- anyos nga giingong nakakita sa pagkawot ni Soronio sa bangag diin makuykoyi ang patay’ng puya niadtong pagkaadlaw’ng Miyerkules.
Matud ni Estrera wala nay mga ginikanan si Soronio apan duna pa kini mga paryente, gani kagahapon giduaw siya nila sa karsel. Nagpuyo kini karon sa balay sa uyoan ug maoy nagbantay sa mga anak niini.
Gidudahan sa kapulisan nga dunay gitago si Soronio nga dili gustong mahibaw-an kabahin sa iyang pagsabak maong wala kini makadawat sa hitabu hinungdan nga iyang gisud sa arenola ang bata sa pagpanganak niini diha sa balay ug gisekreto og lubong sa gikawot nga bangag. (/EIM) (BANAT NEWS)
- Latest
