Doktor ug nurse sa Tuburan District Hospital gipatawag sa NBI-7

CEBU, Philippines - Mipadala na ang National Bureau of Investigation (NBI)-7 og subpoena batok kang Dr. Jatuporn Vatanagul ug nurse aide Chito Chaluag sa Tuburan District Hospital nunot sa gihimong imbestigasyon kabahin sa reklamo sa ginikanan sa batang naluwas gikan sa pagkalumos apan giingong gipasagdan maong namatay.

Si Regional Director Antonio Pagatpagat miingon nga buot nilang makuhaan sa ilang pamahayag sila si Vatanagul ug Chaluag bahin sa maong alegasyon.

Ang pamilya sa 3- anyos nga lalaki nagtuong dunay pagpabaya ang maong doctor maong namatay na hinuon ang bata diha sa maong tambalanan. Ang NBI mihimo sa imbestigasyon aron pagtino kung angayan bang kasohan ang maong mga kawani sa tambalanan tungod sa reklamo sa banayng Lidres. (Mylen Manto/EIM)

Tulo ka minors nga tinun-an sa night  high school gibugaw sa laing minor

Ni Edwin Ian Melecio

Tulo ka mga minor de edad nga mga babayeng nag-edad og 13 ngadto sa 14 anyos ang na-rescue sa mga sakop sa City Intelligence Bureau (CIB) sa Cebu City Police Office kagahapon sa hapon diha sa North Reclamation Area sa barangay Mabolo ning siyudad sa Sugbu.

Ang mga na-rescue pulos mga babaye ug mga estudyante sa usa ka pangpublikong night high school dinhi sa siyudad. Nasayran usab sa mga polis nga ang bugaw sa maong mga babaye usa usab ka menor de edad nga babaye. Sumala pa sa kapolisan ang maong mga bata nga biktima sa human trafficking pinaagi sa sex trade  mangontrata og customer pinaagi sa cellphone ug magpabayad og P1,500 ngadto sa P2,500 kada usa. Si Chief Insp. Romeo Santander, hepe sa CIB sa report sa Balitang Bisdak miingon nga mamili og mga propesyonal ang maong mga bata nga ilang kustomer.

 Ang operasyon gihimo human usa ka concerned citizen ang midangop sa mga awtoridad kabahin sa binuhatan sa maong mga batan-on. Inabagan sa Children’s Legal Bureau natigayon ang maong operasyon.

Ang night high school sa siyudad maoy sagad pilion sa mga estudyanteng gikan sa mga kabus nga pamilya. Ang ubang mga estudyante mga nagtrabaho sa adlawan ug sa gabii lang makalugar aron pagtiwas sa ilang pagtungha. (BANAT NEWS)