Vendor sa Arellano Blvd, nahawan

CEBU, Philippines - Gihawanan sa mga sakop sa City Hall Prevention Restoration Order and Beautification Enhancement (PROBE) ang aseras nga bahin sa Arellano Boulevard kilid sa Madrigal Building.

Ang 16 ka naninda sa mao nga lugar gipapahawa sa mga sakop sa PROBE tungod kay gihulagway nga nakahatag sila og kangil-ad tan-awon, ilabi na nga makita dayon sila sa mga tawo nga mogawas gikan sa Pier-1.

Ang uban sa mao nga mga tindera naninda usab kaniadto kilid sa koral sa Fort San Pedro Plaza apan gipapahawa usab sila tungod gihapon sa susama nga rason. Matud ni Raquel Arce ang hepe sa Probe nga igo lang siya nga mituman sa kamandoan nga gitahas kaniya aron paghawan sa mga aseras isip kabahin sa beautification program ni Mayor Michael Rama.

Apan samtang nahawanan na ni Arce ang mao nga dapit nga sakop sa Barangay San Roque, wala pa niya mahawani ang dalan Legaspi nga atubangan sa Barangay Hall sa Sto. Niño. Ang mao nga lugar agianan sa daghang mga sakyanan ug kanunay nga makasinati og problema sa trapiko ug gireklamo sa mga drayber nga anha mag-agian.

Kapin usab sa napulo ka tindera ang nagbutang og tulda-tulda nga anaa na gayud sa karsada sa Legaspi mao nga ang mga drayber kanunay nga mangreklamo.

Si Arce sayo pa miingon nga nabalaka siya nga pasanginlan unya nga namolitika kun i-clear niya ang mga tindera nga naninda duol sa barangay hall. Ang mga opisyal sa Barangay Sto. Niño alyado sa Bando Osmeña Pundok-Kauswagan (BOPK) nga kontra sa Team Rama sa miaging eleksyon.

Dunay report nga ang pipila sa mga tindahan iya sa mga barangay tanod ug suod sa mga opisyal sa barangay. (BANAT NEWS)