1 milyon kapin giila nga kabus

CEBU, Philippines - Bisan  sa pagtubo sa ekonomiya sa nasud, dul-an sa 1,027,183 ka mga tawo nga nagpanuigon og 15 anyos pataas giila  nga mga kabus nga mga indibidwal sa Central Visayas pinaagi sa National Household Targeting System for Poverty Reduction (NHTS-PR) sa Department of Social Welfare and Development  (DSWD-7).

Matud pa ni Kerwin Macopia sa DSWD 7, 43 porsiyento niini o 441,291 niini walay mga trabaho. Sa  kasamtangan may  25.3 porsiyento ka mga kabus nga indibidwal sa  siyudad ug bukirang dapit nahilakip sa agrikultural nga trabaho sama sa pagpangisda ug usab pagpanguma diin 15.8 porsiyento niini nga nakalista pulos mga skilled ug labor works.

Dugang pa ni Macopia nga 43 porsiyento niining maong mga indibidwal pulos walay tarong tinubdan nga kita. Kasagaran niining maong mga kabus nga walay hustong panginabuhi ania dinhi sa Sugbo ug  ang tanan  mikabat  sa  234, 483; gisundan sa Bohol nga adunay 111,426, samtang 88,024 usab sa Negros Oriental ug gisundan kini sa probinsya sa Siquijor nga adunay 7, 358 ka mga kabus nga indibidwal.

Gipadayag ni Macopia nga kining maong mga datos nagpakita nga ang kakabos nga resulta sa pagkawalay trabaho usa ka nag-unang isyu nga giatubang sa nasud. 

Gitataw ni Macopia nga ang DSWD mitubag sa mga nagkalain-laing kabalaka ug isyu pinaagi sa mga nag-unang social protection programs niini sama sa Pantawid Pamilya Pilipino Program, Kapit Bisig laban sa Kahirapan-Comprehensive and Integrated Delivery of Social Services (Kalahi-CIDSS), ug usab Sustainable Livelihood Program (SLP). Pinaagi sa SLP, matubag gilayon ang problema kabahin sa pagkawalay trabaho tungod kay kining maong programa usa ka community-based nga programa.

Dinhi  gipalambo ang mga kabus diin  gipili base sa listahan sa NHTS-PR nga usa usab ka information management system nga moila kung kinsa ang mga kabus ug asa usab nga dapit sa nasud sila nahimutang.

Busa giawhag sa DSWD-7 ang mga bag-ong natudlo nga molingkod nga mga local chief executives sa paggamit sa available nga datos aron makaumol og tukmang sosyal nga proteksyon nga programa ug usab serbisyo partikular na sa pagtubag sa problema sa mga walay trabaho sa ilang lokalidad. (BANAT NEWS)