Kapin 2 mil ang misobrang eskuyla sa Talisay

CEBU, Philippines - Sobra sa 2,000 ang saka sa gidaghanon sa mga estudyante nga nagpa-enroll sa mga publikong tunghaan sa dakbayan sa Talisay.

Kini base sa report sa Department of Education sa siyudad niadtong Lunes apan ang maong gidaghanon gilaumang mosaka pa tungod kay duna pay mga nagpa-enroll.

Base sa report nga sobra sa 100 ka mga estudyante nga gikan sa mga pribadong tunghaan ang namalhin diha sa Talisay City Central School tungod sa pagsaka sa matrikula sa mga pribadong tunghaan.

Si Woodrow Denuyo, Superintendent sa DepEd Talisay City Division nagkanayon kini nga wala pa siya’y ulahing kasayoran kabahin sa gidaghanon gyud sa mga tinun-an nga gikan sa pribadong eskwelahan nga nagpa-enroll diha sa Talisay City Central School apan matud niya nga sa Laray Elementary School sa barangay San Roque mokabat sa 50 ka mga estudyante gikan sa pribadong tunghaan ang nagpa-enroll diha sa nahisgutang publikong eskwelahan.

Gibutyag ni Denuyo nga base sa iyang nadawat nga report kagahapon gikan sa mga publikong mga tunghaan mikabat ngadto sa 3,363 ang gidaghanon sa nagpa-enroll sa kinder karon milabaw kini og 143 ang gidaghanon kompara sa milabay’ng tuig nga 3,506 sa elementarya mikabat ngadto sa 28,333 labaw og 2,296 kompara sa milabay’ng tuig nga 26,037.

 Apan sa segundarya niining tuiga mikunhod kini og 1,628 tungod kay niining tuiga dunay 9,930 ang nagpa-enroll diin sa milabay’ng tuig mikabat ngadto sa 11,558.

Sa pagsaka sa gidaghanon sa estudyante gilauman nga magkuwang usab kini og mga classroom hinungdan nga nagpahigayon og double shifting ang mga klase karon buot pasabot nga dunay magklase sa alas 7:00 sa buntag hangtud sa alas 12:00 sa udto dayon ang ikaduhang shift magklase mga ala una sa hapon hangtud sa alas 5:00 sa hapon.

Sa laing bahin, ang kahuot sa karsada sa pagbukas sa klase maoy unang nakitang problema sa kapolisan.

Si Superintendent Elmer Lim, officer-in-charge sa Talisay City Police Station nagkanayon nga nabantayan nila diha sa Lawaan Elementary School nga usa sa mga dagkung tunghaan sa Talisay nga nagdasok ang mga estudyante ug mga ginikanan. Uban sa maong mga estudyante mao pay pagpa-enroll niadtong Lunes.

Gawas niini sobra sa duha ka oras nga naghuot ang dagan sa trapiko diha sa lugar apan hinuon dunay mga traffic enforcer ang nagmando sa trapiko.

Hinuon bisan sa maong problema matud ni Lim nga malinawon ang pagbukas sa klase.

Hangtud sa sunod semana dunay mga polis nga ipakatap diha sa mga dagkung tunghaan sa siyudad.

Sugod kagahapon ang mga polis magbantay diha sa mga tunghaan gikan sa alas 6:00 sa buntag hangtud sa alas 6:00 sa gabii.

Kagahapon sa buntag dunay nahitabong tensiyon diha sa Tabunok Elementary School tungod sa usa ka 9-anyos nga batang lalaki nga usa ka special child kinsa midagan gawas sa tunghaan mga alas 9:00 sa buntag hinuon usa ka oras ang milabay napalgan ang maong bata diha sa flyover maayo gani kay wala kini madisgrasya.

Si Lim nanawagan sa mga administrator sa tunghaan nga kanunay’ng isirado ang ilang mga gate panahon sa tingklase aron walay batang makagawas paglikay sa disgrasya.

Ang mga ginikanan gipanawagan usab ni Lim nga alalayan ang ilang mga anak o ihatud ngadto sa tunghaan ilabi na kadtong mga gagmay pa.

Sa laing bahin usab, karong adlawa (Miyerkules) ang kapolisan sa siyudad mopahigayon og adopt-a-class diin usa ka klase sa grade three  nga gilangkuban sa 60 ka mga pupils diha sa Linao Elementary School ang makabenepisyo sa mga school supplies nga ipanghatag sa kapolisan.

Gawas niini ang maong eskwelahan makabenepisyo usab kini sa mga foot pot nga ihatag usab sa mga polis aron panahon sa ting-uwan ang mga bata dili kini magkalapok tungod kay duna may malatayan. (BANAT NEWS)