Sitoy nasagmuyo, Magpale mibutyag nga duna pa sila’y gipanid-ang laing cyber porn sa siyudad ug lalawigan

CEBU, Philippines - Gikasagmuyo ni Cordova Mayor Adelino Sitoy nga duna na say operasyon sa cyber pornography  sa iyang lungsod bisan pa man sa hugot nilang pangampanya batok niini sukad nga dunay nadakpan sa milabay’ng tuig 2011.

Niadtong Domingo sa kaadlawon, gidakop sa mga sakop sa National Bureau of Investigation ang duha ka magtiayon tungod sa pag-operate niini og cyber pornography.

Giingong gigamit nila ang 13-anyos nga anak, usa ka 14 –anyos nga pag-umangkon ug ang 17-anyos nilang silingang lalaki sa iyang malaw-ay nga operasyon.  Ang mga bata gidala na ngadto sa buhatan sa Department of Social Welfare and Development aron sila maatiman ug dili na ma-exploit pa.

Matud ni Sitoy nga ang pagkasakop sa maong krimen nagpasabot lang nga nagpadayon diay gihapon ang maong ilegal ug immoral nga buhat sa ilang lungsod.

Tungod niini mopatawag og tigom si Sitoy tali sa mga ginikanan, pundok sa mga kababayen-an ug sa mga sakop sa Parents and Teachers Association kon PTA aron subling hingusgan ang kampanya kontra cyber pornography sa Cordova.

Matud sa mayor nga dili rason ang kalisod aron mosulod sa maong illegal nga buhat.

Gihagit usab sa mayor ang nasudnong kagamhanan ilabi na kadtong hingtungdang ahensiya sa gobyerno nga monitoron ang internet nga maoy gigamit pag-abuso ning maong mga cyber criminals.

Buot usab niyang higpitan pa sa mga awtoridad ang mga gipatumang sistema sa mga money transfer nga diin ipadala ang mga bayad sa mga langyaw sa mga cyber sex criminals dinhi sa nasud. Samtang gikalipay og dako ni Vice-Governor-Elect Agnes Magpale ang balita nga nasikop ang gibansagang “Queen of Cyberporn” ug iyahang bana.

Matud ni Magpale nga nakahinabi niya mismo ang agent sa Homeland Security Agency sa Amerika ug mapasalamaton kaayo siya tungod sa ilahang mga sopistikado nga gamit nga maoy mi-trace sa internet connection.

Buot usab nga makaestorya ni Magpale si Cordova Mayor-elect Arleigh Sitoy mahitungod aning maong isyu.

Gibutyag usab ni Magpale nga  duna silay gipanid-an sa Cebu City ug habagatang bahin sa lalawigan sa Sugbu nga nalambigit gihapon sa cyber pornography.

Matud pa sa bise gobernador kining ilang gipanid-an giingong migamit gihapon og mga minors o bisan na sa ilang mga anak aron paghimo sa malaw-ay nga buhat atubangan sa camera. Giangkon ni Magpale nga samtang nagkadaghan ang mga modernong gadgets karon mas maglisod na ang mga awtoridad sa pagsubay kanila. Kun itandi kaniadto, ang internet gamitan gyud og kable o antenna apan tungod sa modernong mga gadgets nga dunay kaugalingong internet access pinaagi sa wi-fi nakadugang kini sa kalisod sa monitoring.

Miuyon usab si Magpale sa panawagan ni Sitoy nga pahigpitan ang sistema sa pagpadala og mga kwarta sa mga bangko ug ang mga money transfer companies nga maoy agian sa bayad sa mga parokyano sa mga cyber criminals. (BANAT NEWS)