Naglakaw sa karsada giluthang

CEBU, Philippines - Wala  pa  hiilhi  sa tagtungod  ug  sa kapolisan ang  mipusil  patay  sa usa  ka  ulitawo  nga naglakaw  sa dalan  sa sitio Kilawan,  barangay Tangke, dakbayan sa Talisay  kagahapon  sa ala 1:00  pasado  sa       kaadlawon.

Ang  biktima giila  sa kapolisan  nga  si Jimmy  Cabellon, Jr, 20, ulitawo  nga  taga sitio Proper  Kabanayan,  barangay  Bulacao  sa maong  dakbayan.

Si  PO2 Jason del Campo, desk officer  sa Talisay  City  Police Station mibutyag  sa Banat News  nga  pauli  na  sa ilang  balay  ang  biktima  nga  naglakaw  nga  nag-inusara  sa karsada  dihang  girapido  kini  og  mga  bala  sa wala  hiilhing  pistolero.

Matud  pa  ni  PO2 del Campo  nga  nasabak  sa daghang  mga  bala  ang  nagkadaiyang  bahin  sa lawas  sa biktima  hinungdan  sa hinanaling  kamatayon  niini.

Midugang  si  PO2 del Campo  nga napunitan  nila  sa dapit  nga  nahitaboan  mao  ang  tulo  ka kabhang  sa bala sa 9mm caliber  pistol  ug  shade  nga  green  ang  kolor.

Gihatud  sa kapolisan ngadto  sa Talisay City District  Hospital ang  biktima  diin  kini  ideklarar  nga  patay  na  sa pag-abot  didto.

Padayon  pa  nga  giimbistigar  sa kapolisan  ang  maong  hitabo  nga  gidudahan  nilang  dumot  ang  hinungdan  tungod  sa matang  sa  pagpamusil    nga nahiagoman sa biktima. (/WC)  (BANAT NEWS)