Joavan mura kuno’g tagulilong

CEBU, Philippines - Nakaipsot sa tinong kamatayon si Joavan Fernandez gikan  sa nagbahad  na  nga  kapolisan  ug  mga sundawo  nga  modakop  kaniya  patay  kon  buhi  atol sa checkpoint  niini  didto   sa Brgy. Kalawisan, dakbayan sa Lapulapu   sa miaging  gabii.

Matud pa ni Lapulapu City Police Office Director P/SSupt. Rey Lyndon Lawas   nga  sayo  niini  nakadawat  sila  og tawag   gikan  sa Talisay City Police Station  nga   si Joavan   nasigpatan  kuno sa usa ka resort sa Brgy. Suba-basbas, dakbayan sa Lapulapu  sa maong  higayon.

Ang  kapolisan sa Lapulapu  uban  sa  mga  sakop  sa  Philippine  Air Force (PAF)  milihok  dayon  ug miadto   sa maong  resort  ug  giukoy  si Joavan   apan usa  ka  bayot  ug  usa  ka  lalaki  maoy  ilang  nasikop, samtang  si  Joavan  uban  sa  usa  ka  babaye  nakaikyas.

Tungod  kay   nasigpatan  sa  kapolisan  si  Joavan  sakay  sa puti nga Everest nga adunay YKK 499 nga  plate  number   nga  inabangan  niini  sa usa  ka Rent  a  Car   shop,  ila  kining  gigukod.

Apan  matud  pa   gipangikog  ra  ang  sakyanan  sa kapolisan  sa kakusog  nga  mipadagan  ni  Joavan  sa inabangan  niining  sakyanan.

Unya  pagkakita  niining  may  road  block  nga  gipahigayon  ang  kapolisan  sa una  ug  sa ikaduhang  Mactan - Mandaue  bridge kalit kining miliko padung sa Brgy. Poblacion   ug  misirit ngadto na sa Brgy. Babag.

Sa  pagsaylo  niini   sa Brgy. Kalawisan nasigpatan  na usab kini  sa mga sakop sa  kapolisan  ug   PAF  nga  nag-atang  kaniya didto,  hinungdan nga gipusil   nila ang  luyo nga ligid sa gisakyan ni Joavan   busa  napugos  kini  paghunong   apan  giingong  sama  sa tagulilong  si  Joavan  dali  kaayong  nakaikyas  ug  nahanaw  daw  aso.

Busa  mipasidaan  si SSupt . Lawas  nga  kutob  sa  mga  pamilya  sa maong  lugar  nga  masayran  nga  maoy misalbar  kang  Joavan  ilakip  nila  sa  kaso  nga  ilang  ipasaka. (BANAT NEWS)