Mitulis-patay sa loan officer gitumba sa polis

CEBU, Philippines - Suspek sa pagtulis ug pagpatay sa usa ka babayeng loan officer niadtong Abril 16 ning tuiga sa usa ka mall ang napusilan patay kagahapon sa hapon sa Acacia Hills, Brgy. Jagobiao sa siyudad sa Mandaue.

Ang napusilan giila nga si Renante Mata Baldecantos, 26, taga Bagacay Ozamiz City.Sa pakighinabi sa Banat News ni SPO3 Marcos Noval Jr. imbestigador sa maong kaso nga adunay mi-report kanila bahin  sa duha ka armadong lalaki  nga nagmotor  sa maong lugar.

Sa pagsusi sa mga polis sa lugar daling misutoy og padagan ang duha hinungdan sa ginukdanay apan misaliring ang motor ug dihadiha miibot og armas si Baldecantos .Tungod niini giunhan kini sa pagpusil sa mga polis apan nakaipsot ang kauban niini sakay sa maong motor.

Matud pa ni Noval, si Baldecantos positibong giila sa mga saksi nga mao ang mitulis ug mipatay  ni Lyriza Amar, loan officer sa usa ka lending firm.

Nakuha sa mga kapolisan ang usa ka hand grenade ug kalibre 45 gikan ni Baldecantos. (Genevieve Dejito,CNU Intern/EIM) (BANAT NEWS)