Ginang napaig sa sunog

CEBU, Philippines - Maayong pagkasunog sa lawas nga maoy naingnan sa hinanaling kamatayon sa usa ka paralisadong babaye dihang nasunog ang ilang duha ka andanang balay sa Nitrogen St. Deca Homes Phase 3 sa barangay Tungkil lungsod sa Minglanilla.

Ang namatay mao si Estrella Panuncia, 59, nakaangkon og sunog sa iyang kalawasan na-stroke kaniadto ug dili na makalakaw.Nahitabo ang insidente pasado alas-3 kagahapon sa hapon. Gibutang lang sa kabomberohan sa 1st alarm ang sunog ug gibana-banang mokabat sa P10 mil ang danyos.

Matud pa sa usa ka Moymoy Yumang, 22, nakabantay siya sa aso gikan sa balay sa mga Panuncia maong dali siyang misinggit og sunog.

Dugang pa ni Yumang nga ang katabang sa biktima nga si Erlinda Doremon, dali usab nga nangayo og tabang apan wala kini makasaka pa sa taas tungod sa karatol niini.Ang mga tawo nagtinabangay sa pagsabli’g og tubig sa balay hangtud nga napawong kini bisan wala pay mga bombero nga naabot apan wala na masalbar pa ang biktima.

Si Doremon nga nahinabi sa Banat News nanglaba siya sa gawas samtang ang biktima didto sa taas ug natulog nga nagpa-electric fan. Matud niya mao ra kadto ang appliances nga nag-andar nianang tungora.Ang bana sa biktima nga si Peter, dihang nakahinabi sa Banat News miingon nga didto siya sa trabaho dihang nahitabo ang sunog.

Gibasol niya ang katabang nganong wala niini madala sa gawas ang iyang asawa.Sumala pa niya nakatambo pa sa bintana ug nakawara-wara pa sa iyang mga kamot ang iyang asawa.Samtang si FO2 Rafael Basabe, investigator sa Minglanilla Fire mibutyag nga base sa pamahayag sa usa ka Romeo Nacion nga gisuwayan pa unta nila sa pagtabang ang biktima.

Apan giingong natagakan ang ginang sa nagkalayo nga kisami ug hilabihan na  ka-init sa sud sa lawak hinungdan nga wala na gyud nila kini makuha pa.Gipasabot usab ni Basabe nga napawong na ang kalayo sa ilang pag-abot tungod kay nadawat nila ang alarma ulahi na kaayo tungod kay nagpasa-pasa ang tawag sa telepono. Gani, nakadawat sila og tawag gikan sa munisipyo ug dili gikan sa lugar sa nasunogan.Usa sa gisubay karun ni Basabe nga hinungdan sa sunog mao ang posibling pagbuto sa electric fan. (BANAT NEWS)