Sakop sa Bloods napusilan

CEBU, Philippines - Kritikal ang kahimtang sa usa ka ulitawo nga sakop sa "Bloods Gang" human kini pusila didto sa Brgy. Tayud lungsod sa Consolacion sa milabay’ng gabii.

Ang biktima mao si Ralph Almendras, 19, ulitawo taga Liloan,  ug  usa ka sakop sa Bloods Gang.

Samtang ang gitumbok nga suspetsado  sa pagpamusil mao si Louie Sasing, ug usa ka Bebot nga luwan sa motorsiklo.

Segun  sa kapolisan, si Almendras uban sa iyang mga kauban sa gang nag-inom  sa usa ka tindahan sa dihang miabot ang mga suspek.

Walay daghang estorya gipusil ni Sasing ug Bebot  si Almendras kinsa  nasabak  sa walang dughan.

Dali  nga   gidala  ang biktima ngadto  sa Cortes General hospital ubos sa talandugong  kahimtang.

Padayon  pang gisusi  sa kapolisan  kun  may labot  ba  ang  maong  pagpamusil  sa dinumtanay  sa  mga nagkaatbang  nga  mga  gang  sa maong  lugar.

Samtang  gipangita  pa  usab  nila ang  mga suspetsado  kinsa  nanglayas  human  sa hitabo.  (BANAT NEWS)