Naligsan ulo pisat

CEBU, Philippines - Napisat ang ulo  sa usa ka babaye dihang naligsan  kini   sa ten wheeler truck nga gimaneho sa iyang kapuyo sulod sa usa ka construction site sa barangay Babag II, sa dakbayan sa Lapulapu sa miaging kaadlawon.

Ang biktima mao si Ludivina Soquib Ebao,  59, samtang  ang driver  sa sakyanang  nakaligis  kaniya  mao si Rolito Gisabal, 47, kapuyo  sa biktima  kinsa  pulos  lumad  nga taga Poblacion ,sa Quezon, Bukidnon  ug  pulos stay-in  sa construction  cite  sa Babag II.

Si PO2 Joven  Pino, imbestigador sa traffic division sa Lapulapu  City Police Office nga nahinabi sa Banat News miingon nga pulos pa nangatulog ang ilang mga  kauban nga mga trabahante sa dihang  nahitabo  ang maong  pagpangligis.   

Gumikan  niini  bugtong pamahayag lamang sa suspetsado ang nadawat  sa kapolisan.

Dugang pa ni PO2 Pino  nga  segun  sa suspetsado, nagpaingon  siya  sa Talamban sa dakbayan sa Sugbo  kay  maghakot og anopog nga dad-on sa maong construction site.

Apan dihang gipadagan na niini ang gimaneho nga ten wheeler truck kalit lang nadungog  niya  ang  pagboto sa ligid niini.

Busa  iyang  gisusi ug  maoy  iyang  nadiskobrehan   ang ulo sa  biktima nga napisat  ug nanuasik  ang utok  niini   kay nalatayan  sa ligid  ug  diha-diha  namatay  kini.

Si PO2  Pino miingon nga ang mga kauban nga trabahante sa maong suspetsado  mitug-an  kanila  nga  ang  maong magkapuyo  pirme  lang  maglalis nga nakapatahap  sa kapolisan  nga  tinuyo  ang  maong  pagkaligis.

Matud pa ni PO2 Pino nga ang suspetsado kinsa boluntaryo nga mitahan sa iyang kaugalingon ngadto kanila  nagtingkagol   na karon  sa bilanggoan, samtang  padayon  ang  imbistigasyon  nga  ilusad  sa kapolisan. (BANAT NEWS)