Trabahante sa pabrika sa barko gipusil patay

CEBU, Philippines - Namatay diha- diha ang trabahante sa Tsunieshi Heavy Industries nga nagbase sa lungsod sa Balamban human kini banhigi  sa wala hiilhing  criminal   didto sa Sitio Combado, barangay Cantuod, sa lungsod  sa Balamban niadtong Lunes  sa gabii.

Ang biktima  mao si Rogie Napoles Jamandron, 21, ulitawo ug trabahante sa Tsunieshi Heavy Industries  ubos   sa kontraktor  nga  Metaphil Construction .

Si PO2 Godofredo Dumdum sa Balamban Police Station  mibutyag  sa Banat News nga naglakaw  paingon  sa highway  ang   biktima dihang  pag-abot  niini  sa taytayan  sa maong  lugar  kalit  lang gipusil  sa wala  hiilhing  kriminal.

Ang biktima nga  naigo sa nagkalain- laing bahin sa lawas nahagba diha-diha   sa yuta ug namatay nga wala na madala pa sa tambalanan.

Gumikan  sa kamingaw  sa maong  lugar  ug ngitngit  usab  kaayo walay  nakasaksi  nga  makatumbok  sa kriminal

Ang mirespondi nga mga polis nakapunit  og walo ka kabhang sa kalibre .45  nga  pistol  nga gituohang gikan sa armas nga gigamit sa pagpusil patay  sa biktima.

Ang kapolisan  nga  nagpadayon  pa  sa   pag-imbistigar   sa maong  krimen  nagtuo  nga  may  labot  sa gidiling  drugas ang  maong  hitabo. (WC)(BANAT NEWS)