Tanod nga nagkuyme sa tigbakay giluba patay

CEBU, Philippines - Namatay ang usa ka tanod nga kuyme sa tigbakay human kini dunggaba sa usa  ka sugarol  nga  nasuko nga  gitabla   ang  away sa manok nga gipustahan  niini  atol sa pista didto sa barangay Lawaan sa lungsod sa Alcantara niadtong Domingo sa alas 6:10 sa gabii.

Ang biktima mao si Cayo Temblor, 54, minyo, taga Poblacion  ug tanod sa maong dapit.

Samtang ang suspek mao si Vincel Landisa, 33 , minyo ug molupyo ra sa maong dapit.

Si SPO3 Brendo Beriermente, chief investigator sa Alcantara Police  Station mibutyag  sa Banat News  nga atol sa  pista  sa maong  dapit, nagpahigayon  usab  sila  og  tigbakay  ang  mga  sugarol.

Apan giingong  mihiwasa  sa kasuko  ang suspek   dihang  gideklarar  sa biktima  nga natabla  ang  manok  sa iyang  igsoon  nga  gipustahan  niini  og P300 batok sa  kontra  niining laing  manok. 

Sa pagpanggawas  na   sa  mga  sugarol  gikan  sa  tigbakayan, gikuyogan ug gi-agbayan pa kini  sa suspek    apan pag-abot nila sa gawas sa tigbakayan kalit  lang kining  gihansakan  sa suspek  sa  iyang  kutsilyo  ang  liog  sa biktima   ug  dayon giusban  ang    tiyan  ug  kilid  sa naulahi.  

Ang biktima   dali  nga  gihatud sa  mga  sugarol  ngadto sa Badian District Hospital apan  gideklarar kini  nga dead on arrival ( DOA).

Samtang ang suspek nga  nakasibat dayon  human  sa hitabo  miadto deretso  sa pinuy-anan ni PO2 Dioiso Tagupa nga nagpuyo ra usab sa maong lugar  apan nadistino sa Dumanjug Police   Station  ug  didto  siya  motahan sa iyang kaugalingon.

Sa pagkakaron  gibalhug na  ang  suspetsado  sa  prisohan  samtang  gihikay  usab  ang  tukmang  sumbong  nga  ipasaka  batok kaniya. (BANAT NEWS)