Gitigbas sa silingan babaye napahak ang ulo

CEBU, Philippines - Nabulit  sa  samad  ang lawas  ug napahak  ang  ulo   sa usa ka  babaye human  kini  ligira  og tigbas  sa hubog  niyang silingan  didto  sa  barangay Buaya, dakbayan sa Lapulapu alas 12 sa  udto   niadtong  Huwebes, ang  Adlaw sa mga Santos. Ang biktima  mao si Cleope Piamonte, 29, minyo samtang  ang  suspek  mao   usab si Lito Pedellon, 34, minyo,   nga pulos nagpuyo sa maong dapit. Si SPO1 Allan Pantaleon sa homicide section sa kapolisan sa maong dakbayan nga nahinabi sa Banat News miingon nga sayo pa sa buntag sa maong adlaw  nag-inom   na  ang suspetsado sa maong lugar.

Dugang pa niya  nga dihang nahiagi ang biktima   nakadungog  kini  nga  giyawyawan  siya  sa suspetsado  nga maoy  sinugdanan  sa ilang  panaglalis. Apan  init  kaayo  ang  ulo  sa suspetsado  ug  dali kaayo kini  nakakuha  og  sundang  sa ilang balay  dayon  gihabas  niya  og  tigbas  ang   biktima   ug  napahak  ang  ulo  niini  nga  naigo  sa sundang  gawas sa  mga  samad  sa nagkalainlaing bahin s a lawas.

Dali nga gihatud  ang biktima  ngadto  sa  Vicente Memorial Medical Center sa dakbayan sa Sugbo ug  ang suspetsado  nga  nadakpan  dayon  didto  na  huwasi  sa kahubog  sulod  sa prisohan  diin  siya  nagkagulkol  karon  samtang  gipaabot  ang  kiha  nga  ipasaka  batok  kaniya. (BANAT NEWS)