Kontraktor nagmaoy ulo ug tiyan sa higala gitabas

CEBU, Philippines - Maayong pagkatabas ug naukab ang bagolbagol sa usa ka lalaki human kini gitigbas sa nagmaoy niyang gikainom diha sa sitio Katunggan sa barangay Pundol, lungsod sa Balamban kagahapon sa ala 1:30 sa sayong kaadlawon.

Ang biktima mao si Charlie Labariojos, 25, kinsa talandugon pa diha sa tambalanan atol ning pagsulat sa balita human gitigbas sa iyang kainom nga si Rolando Gallo, 37, kontraktor sa buhatanan og barko sa maong lungsod.

Matud ni PO2 Godofredo Dumdum sa Balamban Police Station dihang nahinabi sa Banat News ang biktima ug ang suspek nag-inom apan dihang nangahubog nagmaoy ang suspek ug mikuha og sundang dayon giwarawara ug nangita og away. Ang biktima nagsige og badlong apan migara hinuon ang suspek hinungdan nga giduol kini sa biktima aron unta tambagan apan gihapsan hinuon ang naulahi sa sundang sa kilid nga bahin sa ulo ug naukab ang bagolbagol.

Wala pa gyud matagbaw ang suspek giusban pagtigbas ang biktima diha sa tiyan hinungdan sa pagkatabas niini.

Ang mga silingan sa biktima maoy mihatud niini lahos sa pribadong tambalanan dinhi sa dakbayan sa Sugbo, ang suspek nadakpan ra usab sa mga polis.(/EIM)(BANATNEWS)