Kawatang kagawad

CEBU, Philippines -  Usa ka nagpailang barangay kagawad ug kauban niini ang nasikop human nagpailang manghililot apan pagpangawat diay ang tuyo dihang namiktima ang duha og usa ka tiguwang kagahapon sa buntag sa barangay Ilihan lungsod sa Tabogon.

Ang biktima nailhan nga si Matias Villacastin Layagi, 89, molupyo sa maong lugar samtang ang suspetsado mao silang Jerry Gil nga molupyo sa North Poblacion syudad sa Naga ug Jemilito Andojar, 46 gikatahong barangay kagawad sa usa ka barangay sa Palompon, Leyte.

Sa pakighinabi sa Banat News ni PO2 Ronnie Alivio misaysay kini nga ang biktima personal misumbong nga ang duha pugsanong mihubo sa iyang bulawang singsing.

Dihang nagkaguliyang dunay silingan ni Layagi ang mitawag sa kapolisan hinungdan sa gibutang nga police checkpoint.

Ang hepe sa kapolisan sa Sogod police nga si Insp. Aldrin Villacampa mibutyag sa Banat News nga nagginukdanay pa sila sa mga suspetsado tungod kay pagkakita sa mga suspek sa checkpoint dali kining mitipas og laing agianan.

Sa ilang paggukod naabtan nila ang giabandonar nga motorsiklo sa duha nga mikaratel og suotsuot sa kalasangan sa maong dapit apan nadakpan gihapon sila sa mga polis.

Matud pa ni Villacampa nga modus operandi sa duruha mao ang pagpailang sila mga manghililot o physical therapist ug ilaha gilayong kuhaan og blood pressure (BP) ang biktima nga sagad nga edaran ug kadtong adunay daghang alahas nga daling mailad ug maglisod og gukod.

Aron daw maklaro ang pag-BP mandoan nila ang biktima sa paghubo sa mga alahas niini ug kini mao usab ang hinungdan sa panuhot apan kun mahubo na gani ang alahas mokaratel og dagan ang mga suspek ug manakay og motorsiklo.

Ang kapolisan nagsusi pa kung dunay laing kauban sa grupo ang duha.

(/EIM)(BANAT NEWS)