CEBU, Philippines - Diriyot magkagubot ang mga polis ug mga residente sa sitio Lomar barangay Lorega- San Miguel dakbayan sa Sugbo human gidakop sa mga polis ang usa ka bayot nga gitumbok nga mamaligyaay og illegal nga drugas sa maong dapit.
Hinuon tungod sa daling pag-abot sa dugang mga polis wala makaarte ang mga meron sa suspek nga si Michael Monseda, 31, kinsa nakuhaan og mga pinaketeng shabu human mobaligya niini sa usa ka poseur buyer sa kapolisan.
Ang operasyon gihimo sa mga sakop sa City Anti-Illegal Drugs Special Operations Task Force (CAIDSOTG) inabagan sa Philippine Drug Enforcement Agency (PDEA-7) human makadawat og impormasyon ang kapolisan sa binuhatan ni Monseda.
Gikatahong gitunolan sa suspek ang poseur buyer og usa ka paketeng may sulod nga gituohang shabu human bayri og P300 ug dihadiha gisikop kini, apan ang mga residente gikatahong milaban sa suspek ug nag-‘people power’ sa tuyo nga pabuhian si Monseda.
Ang daling pag-abot sa mas daghang polis maoy nakapakalma sa sitwasyon ug nadala si Monseda kinsa nakuhaan og dugang lima ka paketeng may sulod gihapong gidudahang shabu sa iyang bulsa.
Ang hepe sa CAIDSOTG nga si Chief Insp. Renero Agustin mibutyag nga wala molighot ang suspek apan ang mga silingan niini maoy mibabag.
Matod pa ni Agustin sila nakadawat og report nga namaligya og shabu ang suspek.
Ang suspetsado mihimakak sa pasangil batok kaniya ug nangangkong misampa ra siya og puyo sa higalang babaye isip sulogoon tungod kay nailo na siya sa iyang mga ginikanan. (BANAT NEWS)