CEBU, Philippines - Mokabat sa kapin dos milyones pesos nga kantidad sa Marijuana ang gisunog kagahapon diha sa Regional Public Safety Batallion (RPSB-7) sa lungsod sa Sibonga.
Ang 21 mil nga punoang marijuana gipangunayan og sunog sa mga pinasidunggang dinapit nga silang 1st District Congressman Eddie Gullas, apo niining si Samsam Gullas ug Philippine Drug Enforcement Agency (PDEA-7) regional Director Jigger Montallana ug acting battalion commander Supt. Leopoldo Echica Cabanag.
Atol sa pakighinabi sa mga tigbalita kang Gullas mibutyag nga andam kining motabang sa kapolisan ug PDEA sa kampanya batok ginadiling drugas sa Sugbo.
Ang last term na sa Kongreso nga si Gullas miingon nga ang iyang apo nga si Samsam mao na unya ang mopadayon pagtabang sa kampanya batok sa ginadiling drugas kun kini maoy mopuli kaniya.
Samtang si Montallana sa iyang bahin malaumong matabangan ni Gullas sa ilang mga kakulangon sa gamit sama sa sakyanan sanglit kulang gyud kini ug ang mga karaang sakyanan nga ilang gigamit sa ilang mga operasyon nailhan na og maayo sa mga drug suspects.
Gibutyag ni Montallana nga lig-on ang kooperasyon sa kapolisan ug PDEA batok illegal drugs maong natigayon ang pagsunog sa maong mga ilegal nga tanom. Si Insp. Janus Giangan sa Police Community Relation office miingon nga ang maong mga gisunog nga marijuana nakuha didto sa lungsod sa Badian niadtong buwan sa Hulyo nga miresulta sa pagkasikop sa usa ka barangay kagawad nga si Domingo Amorado Besin nga gikatahong naaktuhang nag-atiman sa mga tinanom nga marijuana. (BANAT NEWS)