CEBU, Philippines - Nagmalampuson ug nagmalinawon ang pagselebrar sa gibanabanang 90,000 ka mga Muslim dinhi sa siyudad sa Sugbo sa tulo ka adlaw nga Eid al-Fitr nga timaan sa pagtapos sa Ramadan kagahapon.
Suma pa sa direktor sa Commission on Muslim Filipinos (NCMF-7) nga si Atty. Malo Manonggiring sa Banat News kapin sa dos mil ka mga Muslim ang nagtapok kagahapon sa Plaza Independencia ug ubang dapit sa dakbayan alang sa maong kalihukan.
Dugang pa ni Manonggiring nga ang mensaheng ilang buot ipaabot mao ang disiplina sa usa’g-usa ug ang pagrespetar sa uban.
Matud pa niya nga moabot ngadto sa 90, 000 ang mga nagpuyong Muslim dinhi sa Sugbu kinsa nagkahiusa sa panawagan alang sa kalinaw sa nasud ilabi na sa Mindanao diin daghang mga Muslim ang nag-rebelde.
Nakadayeg usab si Manonggiring sa patas nga pagtagad sa gobiyerno sa matag relihiyon. Sumala pa niya nga bisan unsa pay relihiyon managsuon gyud ang mga Filipino ug mahinungdanon ang panaghiusa alang sa tanan.
“Meron talagang kapayapaan basta tayo ay may respeto sa isat-isa. Tayo ngayon ay nakakaintindihan at nagtutulungan kasi ‘yan ang ating mga alintuntunin,” sumala pa ni Manonggiring.
Ang mga kalihokan sa Ramadan o bulan sa pagpuasa sa mga Muslim naglakip sa pakigsandurot, paghinatagay ilabi na sa mga kabus ug ang pag-ampo.
Ang pagtapos sa Ramadan gitawag og Eid al-Fitr diin dunay dakong kombira nga mahitabo uban sa pagbinayloay og mga gasa sa mga Muslim. (BANAT NEWS)