CEBU, Philippines - Gibana-bana nga mokabat sa P100 mil ang balor sa 80 ka kahon nga isdang tuloy nga gisakmit sa mga sakop sa Anti Illegal Fishing Task Force (AIFTF) didto sa lungsod sa Consolacion kagahapon sa alas 11:00 pasado sa buntag.
Ang hepe sa Anti Illegal Fishing Task Force Jojo Merencillo mibutyag sa Banat News nga gidakop nila ang maong mga kinahon nga isdang tuloy tungod kay pulos kini pinabuthan gikan sa barangay Kawit ,lungsod sa Medillen.
Matud ni Merencillo nga sayo sa buntag kagahapon nakadawat sila og text message gikan sa nagpa-ilang concerned citizen kalabot sa mga kinahong isda nga pinabuthan nga gikarga aron ibeyahe paingon sa dakbayan sa Sugbo.
Hinungdan nga giporma dayon ang usa ka checkpoint sa mga sakop sa AIFTF sa lungsod sa Consolacion ug pag-agi sa maong tulo ka trak de karga gipara dayun nila ug gisakmit ang mga karga niini ug gipugngan ang sakyanan ug ang drayber niini uban sa tulo ka truckboy
Sa paghimo ning balita wala pa mahibaw-i kun kinsa ang tag-iya sa maong mga isda.
Giingong ideliver na unta kini sa Pasil, dakbayan sa Sugbo dihang giatangan sa mga otoridad ug gisikop.
Ang laing duha ka sakyanan nga kauban sa nadakpan nakasibat busa wala kini masikop og apil.
Si Gobernador Gwendolyn Garcia mimando dayon sa pag-apud apod sa maong mga isda ngadto sa mga pamilya nga nabiktima sa dakung sunog sa barangay Tejero ug Carreta ning dakbayan sa Sugbo
Apil sa gihatagan niini mao ang mga piniriso sa Cebu Provincial Detention and Rehabilitation Center. - BANAT NEWS