CEBU, Philippines - Patay ang usa ka tawo nga gipusil sa ulo atol sa pagpamista niini sa iyang paryente kuyog sa iyang sakop sa pamilya sa barangay Dawis Sur, lungsod sa Carmen ala-una pasado ang takna niadtong miaging hapon. Ang namatay mao si Malbert Laurel, 35, taga barangay Poblacion sa dakbayan sa Danao ug ang nagpusil mao ang duha ka wala hiilhing lalaki nga nagsakay og motorsiklo nga pulos nagsul-ob og helmet.
Si SPO2 Simplicio Gibo sa kapolisan sa maong lungsod nga nahinabi sa Banat News miingon nga nagbarog lang ang biktima sa gawas sa panimalay sa paryenteng gipamistahan dihang kini giduol ug gipusil.
Matud pa ni Gibo naigo sa luyong bahin sa ulo ang biktima, ang mga namista mialibwag og dagan tungod sa kahadlok.
Si Gibo miingon nga human sa maong pagpamusil ang wala hiilhing mga lalaki nga kasarangan ang gidak-on ang panglawas dali usab nga mipabulhot og padagan sa giluwanan nga motorsiklo pahilayo sa maong dapit.
Dali nga gidala sa mga kabanay ang biktima sa Danao Provincial Hospital apan gideklarar kini sa mga doktor nga dead on arrival.
Dugang pa niya nga ang ilang hepe sa kapolisan sa maong lungsod nga si Chief Inspector Jesson Mangaron nga maoy kuyog sa mga sakop sa Scene on Crime Operation (SOCO) nakakaplag sa crime scene og duha ka kabhang sa kalibre .45 nga gituohang gikan kini sa armas sa mga mamumuno.
Ang kapolisan padayon pa sa ilang imbestigasyon sa maong kaso. - BANAT NEWS