Toledo nahimong outstanding city

CEBU, Philippines - Nahimong Outstanding City ang dakbayan   sa Toledo sa tibook   Central Visayas sa pagpatumang hingpit sa Philippine Plan of Action for Nutrition (PPAN) sa National Nutrition  Council (NNC)7.

Gumikan niini ang kagamhanang lokal sa Toledo usa sa mga nakadawat sa Green Banner Award sa culmination program sa National Nutrition Month sa miaging Biyernes sa hapon didto sa City Sports Club sa Cebu Business Park ning  dakbayan sa Sugbo. Ang Toledo nakakuha og 93 porsento sa ebalwasyon nga gihimo sa Regional Evaluation Team nga misusi sa matag siyudad, lungsod ug lalawigan sa tibuok rehiyon bahin sa pagpatuman nila sa mga proyekto nga may labot  sa nutrition.

Ang grupo sa mga evaluator nagsugod sa ilang paghimo og ebalwasyon niadtong Mayo 7 , 2012 ug natapos niadtong Hunyo 28, 2012. Mao kini ang ikatulong tuig sa Toledo sa pagdawat nila sa Green Banner Award gikan sa   NNC.

Sa pagdawat ni Toledo Mayor Aurelio Espinosa    sa maong ganti, iyang gibutyag nga gikan sa matag panimalay hangtod sa tanang eskuylahan sa Toledo, gipakatap niya ang kasayuran bahin sa kamahinungdanon sa pagkaon kanunay og utan ug prutas alang sa maayong panglawas.

Busa aron nga matuman sa tanan, gitudlo niya sa matag pamilya ang pagpananom og utanon sa ilang kaumahan ug palibot sa balay uban sa mga prutas ug lagutmon nga maoy sangkap sa pagkaon nga gikinahanglan kaayo sa panglawas gikan sa gagmay’ng mga bata hangtod sa mga tiguwang.

Nagpasalamat usab si Espinosa sa tanang mga magtutudlo sa tulunghaan sa Toledo nga gipangunahan sa ilang superintendent, supervisor ug principal sa pagpasiugda og mga harden sa utanon ug prutas sa ilang mga eskuylahan. Busa ang mga kabataan nga nagtungha nananom usab og utanon sa palibot   sa ilang panimalay ug gituman ang nakat-onan nila sa eskuylahan . Ang ubang nakadawat og banner award mao ang lungsod sa Jagna, Bohol nga nakakuha og 96.61 posento; ug Zamboanguita, Negros Oriental, nakakuha og 90 porsento. – (BANAT NEWS)