Mipusil ni PO3 Damasco wa pa nakagawas sa Sugbu
CEBU, Philippines - Wala pa makagawas sa Sugbu ang mga suspek sa pagpusil kang PO3 Arnold Damasco sa dakbayan sa Talisay sumala pa sa hepe sa Talisay City Police Station nga si Supt. Eddie Recamara.
Si Recamara nga nahinabi sa Banat News mibutyag nga ilang pasakaan og kaso ang tulo ka mga suspetsado ug hunongon na nila ang hot pursuit operation, nagdumili hinuon sa pagbutyag ang opisyal sa ilang mga pangalan.
Kahinumduman nga duha ka semana ang nakalabay si Damasco gipusil angol sa lalaking nag-angkas og motorsiklo diha sa barangay Lower Mohon, giingong lima ka mga lalaking sakay og duha ka motorsiklo ang mihimo sa krimen.
Duha sa lima ka mga suspetsado mao si Rommel Camasura ug ang tanod sa Lawaan III nga si Abundio Labitad kinsa gipamusil patay sa upat ka wala mailhing mga kriminal diha sa Ruiz Compound, sa barangay Tabunok tulo ka oras ang nakalabay human mapusili si Damasco.
Bisan patay na ang duha, matud pa ni Recamara maapil gihapon sa ilang affidavit ang ilang mga pangalan atol unya sa pagpasaka nila sa kaso batok sa tulo samtang mohimo sila og imbestigasyon bahin sa pagpatay sa duha. Ang anggulo sa drugas gihapon ang lig-ong motibo nga nakita sa mga imbestigador sa pagbanhig kang Damasco.
(BANAT NEWS)
- Latest
- Trending
