CEBU, Philippines - Mga armas, bala ug drug paraphernalia ang nasakmit sa kapulisan gikan sa posesyon sa gidudahang tigpayuhot og ginadiling drugas nga nasikop sa kapulisan sa lungsod sa Argao kagahapon sa alas 11:00 sa buntag.
Ang nadakpan nga suspek mao si Allan Ortiz, nagpuyo sa sitio Looc, Poblacion lungsod sa Argao kinsa nakuhaan og upat ka kalibre sa armas, tulo niini kalibre .357 ug usa ka .38 revolver ug mga bala sa lain-laing kalibre apil na ang mga bala sa shotgun ug bala sa Armalite ug uban pa.
Nakuha usab gikan ni Ortiz ang mga drug paraphernalia, kwarta nga tag P100 ug tag P200 nga gibanabanang moabot og P4 mil.
Matud ni PO2 Benjamin Gerozaga mga alas 11:00 sa buntag dunay nakatug-an kanila nga ang notadong si Ortiz nga kaniadto nadakpan na nila tungod gihapon sa maong kaso nakit-an sa maong dapit nga nibalik sa iyang ilegal nga kalihukan.
Ang suspek nabalhug na karun sa karsel samtang gihikay sa kapulisan ang tukmang sumbong nga ipasaka batuk niya. (BANAT NEWS)