Rama gisaway ni Dizon

CEBU, Philippines - Gisaway ni Konsehal Alvin Dizon ang lakang ni Mayor Michael Rama sa pagpapahawa niya sa   kapin sa 20 ka pamilya nga nanimuyo sa Block 27 sa North Reclamation Area.

Ang maong pamilya gikan sa Mahiga Creek kinsa temporaryong gipabalhin sa mayor sa Block 27 samtang gihikay pa ang relocation site nila didto sa bukirang barangay sa dakbayan.

Usa sa katarungan ni Rama sa pagpapahawa na sa maong mga pamilya gikan sa reclamation area mao nga aron dili sila magsalig nga himoon nilang permanente nga puluy-anan ang maong lugar.

Busa karong naandam na ang kabalhinan nilang yuta didto sa bukiran sa Talamban, gimandoan niini ang operation officer sa Cebu City Disaster Risk Reduction Management Council nga si Alvin Santillana nga ipahinay-hinay na og kuha ang ilang mga linya sa suga ug tubig aron nga maghinayhinay usab sila og balhin   ngadto sa lugar nga gitudlo isip relocation site nila.

Gani gusto ni Rama nga labing maayo nga ikapatuman ang Balik Probinsya Program aron nga mamauli ang maong mga pamilya ngadto sa kalungsoran diin sila maggikan kun dili sila makauyon sa relocation site nga pabalhinan kanila.

Apan alang kang Dizon nga dili maayo ang gibuhat ni Rama ug usa kini ka inhustisya ngadto sa mga kabus nga mga molupyo.

Matud pa ni Dizon nga mas maayo nga dili sila kuhaan og suga ug tubig kay makaluluoy kaayo ang ilang kahimtang ug labing maayo alang kaniya nga   dili na lang papahaawon ang maong mga molupyo gikan sa maong lugar ug labing maayo nga hatagan sila og abag panginabuhi.         

Sumala pa sa konsehal nga kinahanglan nga atimanon sila isip mga tawo nga labaw pa sa hayop.

Gipasabot ni Dizon nga ang siyudad gipasidunggan niadtong Mayo ning tuiga sa Humane Society International didto sa Las Vegas gumikan sa pagka “animal-friendly” sa dakbayan sa Sugbo.

Apan kun mahigugmaon ang taga Sugbo sa hayop, mas labi unta  kining mahigugmaon sa mga tawo, matud niya. (BANAT NEWS)