3-anyos napunggit sa motor

CEBU, Philippines - Nagpatongpatong ang kasong ipasaka batok sa usa ka 21-anyos nga lalaking nakadasmag sa usa ka 3- anyos nga batang babaye diha sa national highway sa barangay Sta. Lucia lungsod sa Asturias niadtong Miyerkules sa alas 5:00 sa hapon.

Ang biktima mao si Loren Caballes Regner, nagpuyo sa nahisgutang lugar samtang natanggong na sa kapolisan ang nakadasmag sa bata nga si Rogelio Mahina ,21 , taga barangay Colonia lungsod sa Tuburan.

Matud ni PO2 Cesar Climaco ang desk officer sa Asturias Police Station nga nahinabi sa Banat News kusog ang dagan ni Mahinay paingon sa direksyon sa Proper Sta. Lucia gikan sa Tuburan.

Ang bata nga gibantayan sa amahan nianang tungora nalipat sa kalit nga pagdagan sa anak sa dalan hinungdan sa pagkapunggit niini sa motorsiklo.

Ang bata daling gihatud sa Balamban District Hospital apan tungod sa kagrabe sa kahimtang niini gibalhin kini og tambalanan sa dakbayan sa Sugbu.

Nasakpan nga walay lisensya si Mahinay nga makamaneho og motorsiklo, wala usab marehistro ang motor niini, wala kini plate number ug wala usab magsuot og safety helmet. (BANAT NEWS)