Lolo ug apo patay sa bangga

CEBU, Philippines -  Patay ang apuhang lalaki ug ang duha ka bulan niining apo samtang laing tulo ang samaran human ang motorsiklo niining gimaneho maayong pagkabangga sa Isuzu cargo truck sa Sitio Iyakan, Brgy Sorsogon lungsod sa Malabuyoc niadtong Domingo sa hapon. Si Ramon Buagas, 55, patay diha-diha dayon samtang ang apo niining si Kate Justine Buagas, patay na usab nga nahidangat sa hospital.

 Ang laing samaran mao sila si Nila Denuyo Buagas, 55, anak niini nga si Alice Buagas, 28 ug si Caira Jane Buagas, 3.

 Sa imbestigasyon sa kapulisan nga padulong na pauli ang mga biktima sa Barangay Labrador sakay sa motorsiklo nga gimaneho ni Ramon gikan nangaligo sa dagat tungod sa kapistahan sa San Juan.

 Matud ni Sr. Insp. Amadeo Pepito, hepe sa Malabuyoc Police Station, nagtangas ang mga biktima samtang ang cargo truck nga dunay plakang GXM-167 nga gimaneho ni Romeo Lebosada, 48, nga taga-Barangay Sorsogon, nagdagan paubos. Giingong pag-abot sa kurbadahong dapit sa dalan wala makabantay si Ramon sa cargo truck hinungdan nga maayong pagkaigo nila niini ug nangalagpot apan sila si Ramon ug Kate lamang maoy nagrabehan og maayo.

 Gisuwayan pa og dala sa MJ Cuenco Memorial Hospital si Kate apan gideklarar kini nga dead on arrival samtang sila si Nila, Alice, ug Caira gidala sa samang hospital apan gibalhin ra usab sa Don Vicente Sotto Memorial Medical Center sa Cebu City.

 Kasong reckless imprudence resulting in multiple homicide and multiple physical injuries gipasaka na kagahapon sa Municipal Trial Court sa Malabuyoc batok kang Lebosada nga nagtingkagol na karon sa karsel. (/EIM)   - BANAT NEWS