CEBU, Philippines - Nadakpan ang usa ka nagpailang asset sa kapulisan sa police checkpoint tungod sa pagdala og armas nga walay lisensiya sa barangay Tamiao sa lungsod sa Compostela niadtong Huwebes sa alas 5:30 sa hapon.
Ang nadakpan sa kapulisan mao si Ruben Jugalbot Cacanog, 54, minyo ug retired traffic enforcer sa lungsod sa Liloan ug nagpailang asset sa kapulisan ug nagpuyo ra usab sa maong lungsod.
Matud ni SPO4 Wilfredo Catorza, imbestigador sa Compostela Police dihang nahinabi sa Banat News nagbutang og police checkpoint sa maong lugar ang mga sakop sa Cebu Police Provincial Office (CPPO) ug kapulisan sa maong lungsod sa maong lugar.
Naatol nga miagi ang suspek nga si Cacanog sakay sa usa ka motorsiklo paingon sa lungsod. Dihang kini gipara nabantayan sa kapolisan ang dala niining armas nga kalibre .45 pistola nga may tulo ka magazine nga may mga bala.
Dihang gipangitaan og papeles sa iyang armas bugtong appointment lang isip asset sa Intelligence Service Group (ISG) ang iyang napakita apan walay legal nga papeles sa pagdala niya sa maong armas.
Ang pagdala og armas kinahanglang adunay lisensya niini ug permit to carry firearms outside of residence (PTCFOR) alang sa mga sibilyan nga pinirmahan lang sa kasamtangang PNP Director sa nasud. (BANAT NEWS)