CEBU, Philippines - Nasikop ang duha ka mga lalaki human sila masakmiti og ubay-ubay’ng pekete sa gituohang shabu sa managlahing lugar sa probinsya sa Sugbo sa miaging Lunes.
Ang nasikop mao sila si Rey Evangelista, 29, taga Cawayan, Dalaguete, ug si Oliver Villahermosa, 35, taga Aliwanay, Balamban.
Si Evangelista nadakpan sa akto nga nag-pot session o nagsuyop og shabu didto sa ilawom sa kawayanan sa sitio Panaguikan, sa barangay Tapon, lungsod sa Dalaguete ug nasakmitan kini og walo ka pakete sa gituohang shabu.
Si PO2 Maximo Belciña sa Dalaguete Police Station nga nahinabi sa Banat News nagkanayon nga human nila madawat ang report bahin sa hinithitay og shabu sa suspetsado, girespondihan dayon nila ni PO3 Allan Sanoy, PO1 Christopher Romarate ug PO1 Arnel Calisang ug didto sa ilawom sa kawayanan nila hisakpi sa akto ang nag-inusarang suspetsado nga nagluratlurat ang mata og hinithitay sa shabu.
Samtang si Villahermosa nasakmitan usab og tulo ka paketeng shabu human kini sikopa sa kapolisan kay giingong nanghasi sa ilang barangay Aliwanay, Balamban.
Ang duha pulos na mikagulkol sa prisohan ug gipasakaan na og kaso sa paglapas sa balaod bahin sa illegal drugs. (BANAT NEWS)