Kasungian tali sa towing company ug Mandaue City 'gi-towing' ngadto sa korte

CEBU, Philippines -  Nunot sa kaguliyang tali sa Jadewell Parking System Corporation ug sa kagamhanan sa dakbayan sa Mandaue sa kontrata sa nahauna pagpanakop ug pag-impound sa mga malapasong motorista hingpit nang midangop sa korte ang maong towing company.

Mipasaka og P33 milyones nga danyos ang Jadewell batok sa dakbayan sa Mandaue sa miaging adlaw human opisyal nang giputol sa dakbayan ang ilang kontrata nga giinsister sa Jadewell nga sa 2015 pa unta matapos.

Gibahig sa mga tagdumala sa nahisgutang kompaniya ang demanda sa kagamhanan sa maong dakbayan sa pagbayad sa ilang kompaniya nga naglangkob P15 milyones nga investments, P15 milyones nga actual and compensatory damages, P2 milyones nga exemplary damages ug P1 milyon nga attorneys fees.

Si Rogelio Tan nga maoy presidente sa nahisgutang towing company nga nahinabi sa mga tigbalita miingon nga ilaha gyung gitimbangtimbang kung unsay buhaton ug nauyonan nga mopasaka sa maong kaso batok sa dakbayan sa Mandaue.

“We tried to settle things with Mandaue before bringing the issue to the court, unfortunately the city government did not talk to us,” pamahayag pa ni Tan.

Kahinumdoman nga niadtong miaging Mayo 5 hingpit nang giputol ni Mayor Jonas Cortes ang kontrata sa maong towing company sa kagamhanan sa maong dakbayan.

Dungan niini ang pagbutang og mga signages ug pahibalo sa mga motorista diha sa kadalanan nga dili na awtorisadong makapanakop ang Jadewell diha sa kadalanan ug isumbong kini sa kapolisan kung moinsister sila pagpanakop.

Nagubot ang maong kontrata sumala pa sa mga opisyales sa dakbayan sa Mandaue kaniadto dihang nakadawat sila og mga reklamo gikan sa mga motorista nga nag-abuso ang Jadewell sa ilang trabaho, dugang pa niini ang giingong wala pagtuman sa maong towing company sa ilang kontrata ug uban pa.  (BANAT NEWS)