Stickers vs krimen gilusad

CEBU, Philippines - Gihangop sa mga motorista ang pagpamutang sa kapolisan sa dakbayan sa Lapulapu og mga stickers sa mga motorsiklo aron mailhan dayon si kinsa ang tag-iya niini nga ilang ipasulod sa ilang “data base record” sa kapolisan sa dakbayan sa Lapulapu.

Si Lapulapu City Police Office Director Sr. Supt. Rey Lyndon Lawas personal nga nangunay pagpapilit og mga "controlled stickers" sa mga motorsiklo nga ilang gipahunong sa checkpoint sa barangay Poblacion.

Ang mga motorista kinahanglang makapakita gyud og rehistro sa motorsiklo, lisensya sa drayber ug uban pang dokumento sa maong sakyanan nga ilang ibutang usab sa “data base” isip record sa Lapulapu City Police Office.

Matud pa ni Lawas pinaagi sa maong stickers dili na kaayo mahasol ang motorista sa pag-utingkay na usab sa iyang rehistro kun makaagi sila og police checkpoints.

Kinahanglan lang gyud nga kompleto ang dokumento sa motorsiklo una pa mahatagan og sticker ang motorista, ang sticker anha gyud ipapilit sa atubangan aron daling makita sa police checkpoints timaan nga kini nainspeksyon na sa kapolisan. Kun duna nay stickers, lisensya nalang sa nagmaneho maoy pangitaon ug dili na kaayo mahasol pang mangutingkay sa ilang rehistro.

Gipaniguro ni Lawas nga eksklusibo sa matag motor ang control number niini diha sa sticker nga ibutang usab sa data base sa LCPO aron dili kini makopya.

Gipanglantawang pinaagi niini mamenusan na ang mga krimeng sagad binuhatan sa riding in tandem nga mga kriminal sanglit dali rang mailhan ang mga tag-iya sa motorsiklo. Bisan sa nakapalangay og diyutay sa trapiko ang paglusad niini kagahapon mas bagang motorista ang mihangop niini, gawas sa stickers sa motorsiklo namutang usab ang LCPO og police hotline numbers sa mga pampasaherong sakyanan sama sa traysikol, taxi ug jeepneys. /EIM (BANAT NEWS)