CEBU, Philippines - Naglutaw sa dagat nga patay na ang usa ka ulitawo kinsa gituohang nalumos kay gi-okoy samtang namasol sa kadagatan sa Purok Ipil-ipil, barangay Dumlog siyudad sa Toledo kagahapon pasado alas 7:00 sa buntag.
Ang biktima nailhan nga si Daniel Rabacal, 18, ulitawo, nga taga sitio Pansol, barangay Cambang-ug sa maong syudad.
Sa pakighinabi sa Banat News ni SPO4 Carmelito Hornales sa Toledo Police Station nasayran nga ang biktima uban sa iyang unom ka kaliwat namasol sa nahisgutang lugar.
Samtang ang iyang mga kauban nalingaw sa pagluto sa ilang mga kuha nga isda, ang biktima ug ang ig-agaw niining si Leodegario Rico maoy nagpabilin sa dagat.
Apan matud pa ni Rico nga wala niya mabantayi ang kalit nga pagkawagtang sa biktima sa iyang tapad hinungdan nga ila kining gipangita sulod sa 30 minutos hangtud nga milutaw kini nga patay na.
Gumikan niini may pagduda ang mga kauban nga posibling giguyod sa okoy ang biktima apan gisalikway kini sa kapolisan . (BANAT NEWS)