Loot nangayo'g lugway

CEBU, Philippines - Human mapakyas sa pagtubag sa kaso nga may labot sa kalapasan sa Local Government Code (LGC), si Mayor Luisa Loot sa Daanbantayan mihangyo nga kahatagan siya og laing lugway kutob sa Hunyo 7, 2012 nga makaduso sa iyang tubag sa kasong iyang giatubang batok sa kagamhanan sa lalawigan.

Si Loot gikiha ngadto sa hunta probinsyal niadtong Mayo 23, 2012 gumikan sa paglapas niya sa Sec. 307 sa LGC nga mao ang Misconduct in Office, Dereliction of duty and Abuse Of Authority.

 Niadtong Mayo 23 ning tuiga ngadto sa Hunta probinsiyal, si Daanbantayan Mayor Luisa Loot pinaagi sa iyang abogado nga si Atty. Leilani Trinidad Villareno mihangyo nga kahatagan siya og laing 15 diyas nga lugway kon hangtud sa Hunyo 7 nga makaduso sa iyang tubag sa kasong giatubang.

Apan tungod sa kadaghang gimbuhaton nga giatiman ni manlalaban Leilani Trinidad Villareno ang abogado ni Loot hinungdan nga wala dayon sila makahigayon sa pagtubag sa maong kaso.

Sa iyang giduso nga Notice of Entry of Appearance with Motion for the Extension of time to File Respondent’s Verified Answer, si Loot nagkanayon nga gumikan sa kaseryuso sa pasangil, siya nangaliya nga kahatagan sila sa maong lugway.

Nasayran nga gipasakaan si Loot og kasong administratiba ni manlalaban Roy Salubre, ang provincial treasurer sa lalawigan sa Sugbo gumikan sa kapakyas niini sa pagtunol sa gikolekta niyang buhis sa lungsod nga alang unta sa panudlanan sa lalawigan.

Hinuon human sa gipangayong dispensa sa mayor sa Daanbantayan gipaabot sa hunta probinsyal nga makatubag na kini karong Huwebes. (BANAT NEWS)