CEBU, Philippines - Samdan ang usa ka call center agent human dunggaba sa mitulis kaniya didto sa barangay Tipolo, dakbayan sa Mandaue sa miaging kaadlawon.
Ang biktima mao si Raffe Temonion, 23 , ulitawo, lumad nga taga South Cotabato , apan nagpuyo sa Tipolo ug nagtrabaho sa Enterface Call Center sa dakbayan sa Sugbo.
Matud pa ni PO3 Antonio Descartin sa Subangdaku police precinct nga gikan pa sa iyang trabaho ang biktima ug samtang naglakaw kini paingon sa iyang gipuy-an kalit lang mitumaw ang wala hiilhing tulisan ug mition kaniya og kutsilyo uban sa pagdeklarar nga tulis.
Dihang nagdumili siya paghatag sa iyang bag nga gisudlan sa iyang suweldo, cellphone ug uban pa nga mga mahinungdanong butang niini, gilayog siya sa tulisan ug giluba apan wala kini molampos pagdala sa iyang bag.
Gihatud siya sa iyang mga silingan ngadto sa Vicente Sotto Memorial Medical Center sa dakbayan sa Sugbo, samtang gipangita pa sa kapolisan ang tulisan. (BANAT NEWS)