CEBU, Philippines - Usa ka lalaking buot untang dakpon apan nakiglayog sa mga polis diha sa tunaan sa kabaw ang namatay human sa ilang binugnoay diha sa Barangay Danglag niadtong Biyernes sa hapon.
Ang kalit lang nalup-og ug namatay giilang si Arman Caburnay, kinsa nadala pa sa tambalanan apan wala na matabang human sa ilang panaglayog ni Senior Insp. Wilbert Parilla, ang officer-in-charge sa Consolacion Police Station.
Si Parilla, sa pakighinabi mitug-an nga nakadawat sila og sumbong gikan sa usa ka concerned citizen kabahin sa mga tawong nanuyop diha sa kawayanan sa Barangay Danglag.
Si Parilla uban nila ni PO1 Rey Ardrique ug PO1 Louie Jay Ferrer miresponde sa dapit luwan sa duha ka motorsiklo nagpakaaron-ingnon silang habal-habal drivers pag-adto sa dapit.
Apan dihang duol na sila kalit nga nanagan ang unom ka mga lalaki tungod kay usa sa unom nakamay-ong kang Parilla bisan nagsuot lang kini og pantalon ug tsinelas ug nagkawo nga may tabong labakara sa nawong.
Nahitabo ang ginukdanay nga miresulta sa pagkasikop sa tulo nga sila si Pascual Talisic, 31, taga San Vicente, Liloan; Butch Vegamora, 28, taga Catarman, Liloan; ug Ramel Licanda, 27, taga Valencia, Alegria.
Usa ka gamay nga paketeng may sulod nga gidudahang shabu ang nakuha gikan kang Talisic ug mga drug paraphernalia nila ni Licanda ug Vegamora.
Wala lung-i ni Parilla og gukod si Caburnay kinsa nakadagan na og 300 metros palayo hangtud nga naapsan niya kini sa kilid sa sapa sa Danglag-Garing apan dihang iyaha na kining sikupon nakiglayog kini kang Parilla.
“Nagkaligiray mi kilid sa sapa. Midahilig siya padung sa sapa, abi tingali niya di ko motaak sa tunaan sa kabaw. Naadto gyud mi sa sapa ug nag-ilogay sa akong armas,” matud pang Parilla.
Sumala pa niya milanat og lima ka minutos nga nakiglayog si Caburnay kaniya aron ilugon ang iyang .9 mm Berretta pistol. “Paakon na man ko niya. Pero ako g’yud gipaningkamutan na di niya makuha ang armas,” dugang pang Parilla.
Si Parilla miingon nga dihay higayon nga nakuyawan na siyang mailogan sa iyang armas tungod kay mas dako kaniya si Caburnay apan dangtan pila ka gutlo daw naupos nga kandila si Caburnay nga natumba.
“Mikalit ra siya og kaluya og maayo, mura’g gi-hapo. Abi ko nag-inartista ra but naglisod na man g’yud siya og ginhawa ug nangluspad so ako siya gidala sa kilid sa sapa,” matud pa sa opisyal.
Dali dayong mitawag si Parilla sa police station nga nangayo og ambulansya , samtang nagpaabot sa sakyanan dunay usa ka gamay nga plastic pack nga milutaw sa lim-aw diin sila maglayog nga gituohan niyang iya ni Caburnay.
Si Caburnay gidala sa Eversley Child’s Sanitarium and Hospital sa Mandaue City apan gideklarar kining patay na. Atubangan sa kawani sa maong tambalanan nga si Oscar Esguerra laing usa ka paketeng gidudahang shabu ang nakuha sa bulsa ni Caburnay.
Ang tulo ka mga kauban ni Caburnay gikatakdang pasakaan og kasong kalapasan sa RA 9165. (BANAT NEWS)