CEBU, Philippines - Giklaro ni Mayor Michael Rama nga ang kakuwang sa mga “supporting documents” maoy hinungdan kung nganong malangan ang paghatag sa financial aid sa ubang barangay.
Ang maong mga dokumento ipreparar matag barangay aron makuha nila ang financial aid sa siyudad alang sa nagkadaiya nila nga proyekto.
Kini maoy reaksyon ni Rama human siya gisaway ni Kongresista Tomas Osmeña nga matud pa nga duna pa’y ubang barangay kapitan nga iyang kaalyado sa Bando Osmeña Pundok Kauswagan (BOPK) ang wala pa kadawat sa mga financial aid hangtud karon.
Si Osmeña maoy ikaatbang unya ni Rama sa pagkamayor sa 2013.
Una na nga gipadayag ni Rama dinhi sa Banat News nga ang tanang barangay makadawat og proyekto sanglit ang proyekto alang man sa katawhan.
Gisaysay ni Rama nga wala sa iyang huna-huna ang pamolitika, pagmatuod niini mao ang gihatag nga financial assistance sa tanang barangay kapitan sa milabay’ng bulan. (BANATNEWS)