CEBU, Philippines - Positibo na ang katumanan sa gitakdang panagtagbo sa mga kadagkoan sa One Cebu Party ug sa Bakud Party. Matud pa ni Kongresista Pablo John Garcia sa ika-tulong distrito nga gihan-ay na karon ang tukmang petsa sa maong panagtagbo ug ang mga butang hisgutanan sa mga liderato sa maong partido.
Dugang pa niya nga usa sa dakong butang nga ilang tukion sa maong miting mao ang bahin sa iyang pagdagan isip gobernador sa Sugbo ubos sa One Cebu Party ug sa paghimo nga bise gobernador ni Vice Governor Agnes Magpale sa Bakud Party.
Kun unsay maayong proseso niini mao kini ang sabotan pag-ayo sa mga opisyal sa duha ka partido, matud pa ni Garcia.
Ang One Cebu Party gipangulohan ni Gobernador Gwendolyn Garcia, samtang ang Bakud Party gipangunahan sa pamilyang Durano sa ika-limang distrito. Ang kalagmitang panag-uban ni PJ Garcia ug Magpale sa election sa 2013 maoy giatangan sa ilang mga supporter.
Sa samang higayon ang mga kaatbang nila sa Liberal Party padayon na usab sa pag-umol sa ilang mga kandidato sa pagka-gobernador ug bise gobernador sa lalawigan sa Sugbo. (BANAT NEWS)