CEBU, Philippines - Namatay ang usa ka tawo nga giluba sa iyang bayaw didto sa ilang balay sa Purok Batong, barangay Cambaro, dakbayan sa Mandaue kagahapon sa alas 11:00 pasado sa buntag.
Ang biktima mao si Erwin Claros Archival, 36, minyo ug drayber sa traysikad , samtang ang suspetsado mao si Eddie Bangcali, 42, minyo nga bana sa manghod sa biktima kinsa pulos molupyo sa maong lugar.
Sumala ni SPO1 Rolando Planco sa Presinto 5 sa kapolisan sa dakbayan sa Mandaue nga nagkalalis ang suspetsado ug ang asawa niini unya miduol ang biktima.
Naglagot ang suspetsado sa pag-apil-apil sa biktima sa ilang lalis, mikuha kini og kutsilyo ug giluba ang biktima hinungdan sa pagkamatay niini.
Padayon pang gipangita sa kapolisan ang suspetsado kinsa misibat dayon human sa hitabo. - BANAT NEWS