CEBU, Philippines - Gipangita karon sa kapolisan ang duha ka tulisang midunggab sa usa ka tinun-an sa kursong nursing sa Cebu Doctors University (CDU) sa barangay Subangdaku, dakbayan sa Mandaue alas-11 pasado ang takna sa buntag.
Ang biktima mao si Mario Chan, 18 , taga San Carlos City sa Negros Oriental ug temporaryong nagpuyo sa dakbayan sa Sugbo samtang nagtungha sa maong unibersidad.
Duha ka mga lalaking nagsakay og Honda XRM nga kolor blue ug walay plaka ang gitumbok nga mitulis ug midunggab sa biktima.
Matud pa ni PO3 Henry Lugo sa kapolisan sa Presinto 2 sa Mandaue City Police Office (MCPO) naglakaw ang biktima sa maong dapit dihang gihunongan sa motorsiklo ug nagpakaaron-ingnong nangutana sa oras.
Dihang gitubag sa biktima kalit nga nanaog ang backrider dayong ibot og screw driver ug gition sa liog sa biktima ug mideklarar og tulis apan gitapi sa biktima ang screw driver.
Ang tulisan nga nakalitan sa pagsukol sa biktima midunggab kang Chan makadaghang higayon, nakaangkon og tapsing nga dinunggaban sa liog ug sa duha ka bukton ang biktima.
Hinuon ang pagsukol sa biktima maoy nakapatalaw sa mga tulisan kinsa daling mipabulhot sa ilang motor palayo. Ang biktima gidala sa Mandaue City Hospital ug gibalhin sa Cebu Doctors Hospital sa dakbayan sa Sugbo. (BANATNEWS)