CEBU, Philippines - Gibutyag ni Kongresista Tomas Osmeña kagahapon nga wala siya mahadlok sa hagit ni Mayor Michael Rama nga ikiha siya og libel. Nagkanayon si Osmeña nga wala siya’y nakita nga libelous sa iyang gipanulti dihang gitawag niya nga murag naa sa “showbiz’ ang mga lihok niadtong mitunga kini didto sa San Miguel aron pagsanta sa demolisyon sa 168 ka pamilya gikan sa ilang gipuy-an sa maong lugar sa miaging semana.
Matud pa sa kongresista nga bisan unsang orasa atubangon niya si Rama ug iyang ipamatuod nga wala siya’y sayop sa iyang gisulti bahin sa gihimo ni Rama niadtong adlaw nga demolison na unta ang mga molupyo.
Si Osmeña mibahad nga dili niya tuison ang iyang gibutyag nga ang opisina ni Konsehal Edgardo Labella ug sa abogado sa tag-iya sa yuta sa Apas nga si Roberto Palmares nagtipon ra.
Wala usab niya panumbalinga ang pagpanaway ni kanhi senador Sonny Osmeña nga iyang ig-agaw kinsa miingon nga dili siya angay mosalmot sa kaso sa taga Apas kay dili man kini niya hurisdiksyon ug ang angay niyang atimanon mao ang iyang katungdanan sa kongreso.
Matud pa ni Osmeña nga dili angayang tuohan ang kanhi senador niyang ig-agaw kay wala na kini kredibilidad busa wala na gayud kini modaug pa. - BANAT NEWS