CEBU, Philippines - “Normal ra nang kiha, wala ko mahadlok,” mao kini ang mensahe sa executive director sa Cebu City Bantay Dagat Commission (CCBDC) kalabot sa giatubang niyang reklamo nga gisang-at sa usa ka inhenyero nga paglapas sa Republic Act 3019 o Anti-Graft and Corrupt Practices Act diha sa Ombudsman for the Visayas.
Matud pa ni Ranulfo Sebusa nga walay igong basehan ang gipadayag sa kihante nga si Engineer Romeo Villaceran batok kanila.
Kahinumduman nga gireklamo ni Villaceran ang grupo ni Sebusa ug Nathaniel Lucero sa Bureau of Fisheries and Acquatic Resources (BFAR) ug uban pa mga miyembro sa CCBDC.
Mireklamo ang kihante tungod sa kadako sa alkanse niini sa iyang negosyo ug miinsister nga dili pinabuthang isda ang nasakmit sa Bantay Dagat niadtong Abril 12 sa kaadlawon diha sa Pasil Fish Market.
Ug giingong nalangan ang ilang pagbaligya sa mga isda nga miresulta sa ilang pagkaalkanse hinungdan nga gikiha niini ang Bantay Dagat.
Apan depensa pa ni Sebusa nga igo ra niya gibuhat ang iyang trabaho sa paggukod sa ilegal nga panagat. Sumala pa niya nga duna na siya’y giandam nga mga tubag batok sa kihante busa andam siya moatubang sa kiha.
“Trabaho ra man na ato, walang personalan,” matud pa ni Sebusa.
Dugang pa niya nga bisan sa kagamay sa budget sa Bantay Dagat, dili kini babag sa ilang operasyon.
Matud pa niya nga subsob ang ilang kampanya sa paggukod sa mga tawong nalambigit sa ilegal nga panagat. (BANATNEWS)