CEBU, Philippines - Duha ka tawo nga nanglabni og cellphone sa pasahero nga babaye sa jeepney sa barangay Subangdaku, dakbayan sa Mandaue hingpit na nga gipasakaan og kaso kagahapon sa kapolisan.
Ang duha nga gipasakaan og kaso nga robbery mao sila si Vicente Cañete, 18, ug Junrey Alinsug, 18, mga molupyo sa sitio Malibu sa barangay Subangdaku sa dakbayan sa Mandaue..
Ang duha nadakpan sa followup operation sa mga sakop sa Investigation Detection and Management Bureau (IDMB) nga gipangulohan ni SPO2 Dionesio dela Peña.
Ang pagdakop natigayon human ang biktima nga si Rosmarie Canezares, 53, taga dakbayan sa Lapulapu ilang gilabnihan sa miaging gabii. Ang biktima midangop sa kapolisan nga mihimo dayon og followup operation nga miresulta sa pagkasikop sa duha ug nabawi ang cellphone sa ginang. (BANATNEWS)