CEBU, Philippines - Hangyoon ni Cordova Mayor Adelino “Addy” Sitoy si Lapulapu City Mayor Paz Radaza nga ibalik sa naandang rota ang PUJ sa Cordova nga mosulod sa dakbayan sa Lapulapu. Kini ang laraw ni Mayor Sitoy human niya masayri nga walay nahimong hukom si Mayor Radaza sa hangyo sa mga PUJ driver ug operator sa Cordova nga ihunong ang “experimental rerouting scheme” sa dakbayan sa Lapulapu nga gipatuman sukad pa sa milabay’ng semana.
Matud pa ni Sitoy nga naglaraw ang mga driver sa Cordova nga mo -strike kun dili matuman ang ilang hangyo sa kagamhanang lokal sa dakbayan sa Lapulapu.
Giangkon ni Mayor Sitoy nga dili pa sila andam sa paghatag og igong sakyanan ngadto sa iyang mga konstituwente nga maapektohan unya sa welga sa mga PUJ sa Cordova.
Gumikan niini iyang pakigtagboan ang mga sakop sa konseho ug ubang ahensiya sa lungsod sa Cordova aron hisgutan ang mga pamaagi sa paghatag og igong sakyanan kun ugaling ihinayon sa mga driver ang ilang plano.
Miingon si Sitoy nga pakigkitaan usab niya si Mayor Radaza aron masulbad ang maong problema.
Sayo niini wala tagda ni Radaza ang hangyo sa mga PUJ operator ug driver sa Cordova human kini molusad og protesta atubangan sa City hall sa milabay’ng Lunes.
Matud pa ni Radaza nga gituyo nila ang temporaryong pag-usab sa rota sa mga PUJ ug uban pang sakyanan aron obserbahan ang sitwasyon sa dagan sa trapiko sa Barangay Poblacion diin mahimutang ang merkado publiko sa dakbayan sa Lapulapu. - BANAT NEWS