CEBU, Philippines - Gihashasan sa buhatan sa City Social Welfare (CSW) sa dakbayan sa Mandaue ang listahan sa mga biktima sa sunog sa sitio San Lorenzo Ruiz sa barangay Jagobiao sa maong dakbayan human madiskobre nga gisagolan kini og ngalan sa mga dili tag-iya sa balay nga nasunog.
Si Violita Cavada nga maoy hepe sa buhatan sa CSW miingon nga gihimoan nila og pakisusi uban sa mga opisyal sa barangay ang maong listahan ug ilang nasuta nga daghan kaayong ngalan sa mga tawong walay balay nga nasunog. Matud pa ni Cavada nga daan na silang nagduda gumikan kay mikabat og 286 ang nahilista nga mga biktima sa maong listahan sa sunog nga nahitabo niadtong miaging Enero 16 ning tuiga.
Apan sa dihang gisusi nila pag-ayo, ilang nasuta nga gilakip diay kadtong mga ngalan sa mga nanag-abang lang sa mga balay nga nasunog.
Gitataw ni Cavada ang kamahinungdanon sa talaan sa mga ngalan sa mga biktima ug sa gidaghanon niini tungod kay mao kini ang basehan sa pagpagawas sa pundong salapi gikan sa calamity fund sa kagamhanan sa maong dakbayan. Nasayran nga ang tag-iya sa balay nga nasunog makadawat og P10,000 nga hinabang, samtang P5,000 usab alang sa mga nangabang. WC - (BANAT NEWS)