CEBU, Philippines - Ang Criminal Investigation and Detection Group (CIDG)-7 maoy giduol sa pamilya sa dinakpan nga namatay tungod sa giingong pagkulata sa mga polis sa lungsod sa Madridejos niadtong Lunes aron maoy mohimo og imbestigasyon.
Kagahapong adlawa si Cerela Iscalicas, inabagan ni Agsungot barangay captain Pastor Jun Alcover Jr. pagdangop sa buhatan ni CIDG-7 chief Jose Pante aron magpatabang sa reklamo.
Gikatahong sugdan sa CIDG ang imbestigasyon karong buntag kauban ang medico legal sa PNP Crime Laboratory nga maoy mo-awtopsiya sa lawas sa namatay nga si Redentor Iscalicas.
Apan sa wala pa namatay ang iyang anak nakatug-an kining tulo ka mga polis ang nagtabang og kulata sa iyang anak ug nakatug-an pa kini sa pangalan sa usa.
Si Redentor gidakop sa mga polis alas 12:00 pa sa tungang gabii adtong Domingo atol sa pista sa sitio Chinese, Poblacion Madridejos ug gidala ug gibalhug sa karsel alas 2:00 pasado na sa kaadlawon.
Si Sr. Insp. Jaime Santillan sa sayong interbyu sa Banat News mipaubos na sa imbistigasyon sa walo niya ka mga sakop nga nag-duty niadtong higayuna.
Ang biktima namatay sulod sa Bantayan District Hospital niadtong Lunes sa alas 11:40 sa buntag human malandig pagka Domingo sa ala-1:00 sa hapon tungod sa grabing kadaut sa iyang tiyan ug girekomendar unta og dinaliang operasyon apan wala na makaagwanta ug namatay. (BANATNEWS)