Banhig tulo patay

CEBU, Philippines - Patay diha-diha ang tulo ka sakop sa pamilyang Sesbreño human kini banhigi sa wala hiilhing mga kriminal didto sa eskina sa dalan Rabaya, barangay Cansojong, dakbayan sa Talisay kagahapon sa alas 3:45 sa hapon.

Ang mga biktima mao sila si Virginia Sesbreño, 65, asawa ni manlalaban Raul Sesbreño, Soledad Epante, 50, caretaker sa panimalay sa pamilyang Sesbreno, ug Joshua Young, hingkod, sinagop sa pamilyang Sesbreno nga pulos nagpuyo sa sitio Puntod, barangay Lawaan 1, dakbayan sa Talisay.

Si Virginia Sesbreno naigo sa tuong abaga kansang bala milapos sa buko-buko ug sa iyang dughan.

Samtang si Epante nasabak usab sa tuong kamot, duha ka bala sa tuo ug walang bahin sa dughan,tuong suxikllary ug suso.

Si Young nasabak usab sa walang dughan, walang auxillary ug walang paa.

Ang kapolisan nagtuo nga tumong unta sa maong pagpamanhig mao si Atty. Raul Sesbreño kinsa niadtong higayona wala mosakay sa gisakyan sa iyang asawa, sinagop ug caretaker.

Ang tulo daling gihatod ngadto sa Talisay City District Hospital apan wala na kini makaabot nga buhi sa maong tambalanan.

Si Inspector Ricardo Echavez kinsa usa sa miresponde sa insidente mibutyag sa mga tigbalita nga sa wala pa ang pagpamanhig, gikan   ang mga biktima   sa demolition site sa barangay Lawaan I, Talisay.

Matud ni Echavez nga ang tulo kinsa sakay sa Isuzu Dmax nga kolor puti ug nagtangag sa plakang YHT-517 paingon unta ngadto sa barangay Inayawan, sa dakbayan sa Sugbo dihang gisundan kini og usa ka motorsiklo nga may duha ka lalaking sakay ug pag-abot sa eskina sa dalan Rabaya misimpig kini sa tuong bahin sa sakyanan sa mga biktima dayong pamusil sa mga sakay niini.

Human sa maong pagpamusil, nakita sa mga saksi ang motorsiklong gisakyan sa mga biktima nga misirit paingon sa dakbayan sa Sugbo.

Nakapunit ang mga polis gikan sa lugar nga nahitaboan og unom ka kabhang ug usa ka slug sa kalibre .45 nga pistola sa atubangan sa drayber.

 Si Superintendente Eddie Recamara, hepe sa Talisay City Police Station sa pakighinabi niini sa mga tigbalita nagkanayon nga nadawat nila ang alarma sa mga alas 3:45 sa hapon.

Ilahang gituohan nga posibleng hired killer ang maong mga kriminal ug ang tumong unta nila mao si Atty. Sesbreño.

Matud ni Recamara nga usa sa dakung posibilidad nga ilang gilantaw karon sa maong pagpamanhig mao ang personal nga bangi kabahin sa yuta.

Midugang siya nga duna silay nahipos nga mga report nga daghan ang nasuko kang Atty. Sesbreño tungod sa pagpalarot niini sa mga balay ug ubang mga edipisyo sulod sa iyang lote.

Gibutyag usab sa hepe nga nakahipos usab sila og report nga si Sesbreño kanunay’ng makadawat og hulga sa iyang kinabuhi ug gani ang balay nga iyang gitukod sa Lawaan I, usahay itsahan og bala nga patabanan og papel nga suwatan og puwa nga tinta.

Apan matud sa hepe nga wala mo-report kanila ang abogado tungod kay gibalewala lang niini ang maong hulga.

Ang kapolisan nagpahigayon pa og follow-up nga operasyon batok sa mga kriminal. (WC)(BANAT NEWS)