CEBU, Philippines - Gibutyag sa kagamhanan sa lalawigan sa Sugbo nga nahuman na ang tulo ka andana ug 100-bed- capacitiy nga Balamban Provincial Hospital Building.
Kini maoy ikaduhang provincial hospital nga nahuman ubos sa administrasyon ni Governor Gwendolyn Garcia.
Ang unang nahuman mao ang Carcar City Provincial Hospital nga karon nag-alagad na sa mga masakiton sa maong dakbayan ug sa kasikbit nga mga lugar niini.
Sumala pa ni Provincial Engr. Eulogio Pelayre nga ang Balamban Provincial Hospital nga gigastohan og P59.3 milyones sa kagamhanan sa probinsiya sa Sugbo maoy moatiman sa mga masakiton sa amihanang bahin sa lalawigan.
Matud pa ni Pelayre nga ang pagpatukod og mga tambalanan sa kalungsoran sa amihanan usa sa mga gisaad ni Gobernador Garcia aron pagtubag sa panginahanglang medikal sa mga molupyo sa ikatulo nga distrito.
Samtang gipahibalo ni Pelayre nga sa bulan sa Agusto niining tuiga mahuman na usab ang Danao City Provincial Hospital Building nga may 100-bed capacity gihapon.
Sa pagkakaron dugang pa ni Pelayre nga ang iyang buhatan nagsugod na usab karon sa pag-andam sa plano ug estimated cost alang sa tukorong laing Bogo City Provincial Hospital building nga may 100-bed capacity gihapon ug posibling kasugdan ang construction niini sulod niining tuiga. - (BANAT NEWS)