e-Blotter system gisugdan sa PRO-6

ILOILO CITY, Philippines  – Gilusad sa Police Regional Office-6 ang e-Blotter nga usa ka modernong pamaagi sa paghipos ug pagtipig sa mga impormasyon ilabi na sa mga nahitabong krimen sa maong rehiyon.

Si Chief Supt. Cipriano Querol, Jr., PRO-6 director, nagkanayon nga ang e-Blotter, nga naila sad nga Crime Incident Reporting System (CIRS), maoy gamiton aron madokumento ang mga panghitabo ug mas paspas ug kasaligan ang pamaagi sa pagpadala sa impormasyon gikan sa mga presinto ngadto na sa regional offices ug ngadto na sa PNP headquarters sa Camp Crame. Sumala pang Querol ang maong sistema usa ka pamaagi aron mas paspas ang crime reporting system sa PNP alang sa epektibong pagpatuman sa balaod. 

“The e-Blotter system will replace the mano-mano system that is cumbersome, inefficient, ineffective and inaccurate,” matud pa ni Querol. Ang e-Blotter maoy bunga sa paninguha sa PNP nga mapalambo pa ang crime reporting system sa nasud. Nasugdan kini sa National Capital Region Police Office niadtong Septiyembre ug misunod sad ang ubang mga police regional offices sa nasud. (BANATNEWS)